Промовирана едукативна вело патека за деца и семејства

Понудата на Едукативниот центар за зачувување на природата во Негрево се збогати со уште една содржина. Меѓународниот ден без автомобили во Пехчево беше одбележан со промоција на едукативната Вело патека која е поставена помеѓу градот Пехчево и Едукативниот центар за зачувување на природата во село Негрево. Настанот се одржа во соработка на Еко логик и ВЕЛО УЧИЛИШТА со ООУ Ванчо Китанов од Пехчево, Општина Пехчево и Едукативниот центар за зачувување на природата во Негрево.

Со поддршка на Швајцарија, преку Програмата за зачувување на природата (ПЗП), патеката е креирана од страна на Еко логик и ВЕЛО УЧИЛИШТА, образовна програма во која членува и училиштето Ванчо Китанов од Пехчево. Патеката е долга 6.5 километри, со висинска разлика од 200 метри, со што спаѓа во категорија на лесни патеки. Се состои од 15 едукативни содржини (табли) преку кои децата и родителите ќе се запознат со основите на велосипедизмот, правилно возење на различни терени, типови на велосипеди, основно одржување на велосипедите и многу други корисни работи за Вело авантури.

Оваа интересна содржина ќе придонесе кон дополнителна промоција на регионот, со акцент на потенцијалот за рекреативен туризам наменет за деца и семејства.