Отпочна процесот на креирање визија за Осогово како идно заштитено подрачје

Како дел од активностите на Програмата за зачувување на природата во Македонија поврзани со процесот за прогласување на Осогово како идно заштитено подрачје,  на 13 и 14 септември во Кочани и Крива Паланка се организираа работилници за креирање на заедничка визија за Осогово како идно заштитено подрачје. На работилниците учествуваа претставници на локално население, планинари, ловџии, земјоделци и невладини организации, а беа организирани со цел локалното население и засегнатите страни да се информираат за активностите за прогласување на Осогово како идно заштитено подрачје, во категорија заштитен предел и да се вклучат во креирањето заедничка визија за Осоговскиот регион.

Визијата на локалното население е дека регионот ќе биде препознатлива туристичка дестинација, дека берачите на шумски плодови ќе бидат лиценцирани и дека повеќето реки ќе имаат пречистителни станици. Учесниците од 7-те општини Кочани, Македонска Каменица, Пробиштип, Кратово, Ранковце, Крива Паланка и Облешево исто така нагласија дека дивите депонии во регионот во иднина треба да се отстранат.

Инаку процесот за креирање на визија за Осогово како идно заштитено подрачје се спроведува паралелно со изработката на Студијата за природни вредности на Осоговските Планини и Социоекономско истражување за регионот како основни документи за отпочнување на постапката за прогласување на дел од Осогово за заштитено подрачје во категоријата заштитен предел.

Во периодот што следува ќе биде организирана и кампања за запознавање на локалното население дека дел од овој масив ќе биде заштитен, додека со клучни чинители од регионот ќе се дефинираат и границите на идното заштитено подрачје.