Проектот го спроведе Национално здружение на сопственици на приватни шуми, во општините Берово и Пехчево. Главна цел на проектот е да допринесе кон зачувување на природата преку побрза природна ревитализација на опожарените шумски подрачја и подигање на свеста за последиците од уништувањето на биодиверзитетот.
Активности кои се реализирани во рамки на проектот:
- Во соработка со стручни лица од Шумарски факултет Скопје, се одреди површина на терен (јаруга) за која се изготви проект за уредување, по што се уреди репрезентативен дел од јаругите и местата со урвински процеси на ерозија со еколошко прифатливи техники (праг од плетери, фашини и обложување на јаругата со гранки);
- На уредените површини се вршеше редовен мониторинг за следење на напредокот на ревитализација на екосистемот;
- Беше организирана работилница од отворен карактер во шума, со сопственици на приватни шуми;
- Се подготви брошура за промоција на еколошко прифатливи техники за уредување на екстремни процеси на ерозија;
- Се организира интерактивна работилница со младите (идните сопственици на шумите) од основно училиште за значењето на шумите и шумските екосистеми;
- За промоција на податоците од мониторингот на парцелите и останатите проектни резултати беше организиран форум во Пехчево, кој беше и медиумски покриен.
