Природата – чуварот на нашите животи
Природата не е, и никогаш не била извор со непресушни ресурси што човекот може бескрајно да ги користи, туку претставува комплексна мрежа на екосистеми и живеалишта што обезбедува живот за сите живи организми на планетата. Животната средина низ милениумите развила внатрешни механизми за обновување, поправање и развој на екосистемите и животот воопшто. Како и за другите видови, така и за нас, природата претставува чувар кој нè крепи и варди постојано, дури и на начини кои не можеме да ги забележиме и лесно увидиме.
Фото: Васил Милјовски
1. Штит и заштита
Дрвјата, зеленилото и вегетацијата го штитат човекот од силните топлински зраци на Сонцето. Секогаш кога ќе сме изложени на топлина, веднаш бараме сенка под некое дрво. Ова особено може да се почувствува во урбаните средини, онаму каде недостасува зеленило условите за живот и престој се особено тешки и непријатни. Затоа е важно да ги чуваме дрвјата и шумските екосистеми.
2. Одбрана во случај на поплава
Речните брегови, крајбрежната вегетација, дрвјата со своите длабоки коренови системи како и блатата, поплавните ливади и мочуриштата се наша главна заштита од неконтролираното недоаѓање на водите. Тие како сунѓер ја впиваат сета вода, а преку корењата и гранките го стабилизираат речниот или езерски брег од уништување и ерозија.
3. Заштита од климатските промени
Човекот преку своите активности, вртоглаво ги забрзува климатските промени и сите настани што следуваат со нив. Природата преку различни начини како акумулирање на стакленички гасови, акумулирање на загадувачи, складирање на материи во почвата нè штити од последиците од климатските промени, без разлика на тоа како влијаат врз нив.
4. Природата нè лечи
Сите лековите супстанци, сите лекови и медикаменти сите доаѓаат од природата. Без разлика дали ги користиме директно во сурова форма или обработени, сите лековите дејствија кои ги добиваме доаѓаат од метаболизмот на растенијата, габите и животните развивани во текот на еволуцијата.
5. Природата е нашиот храм
Човекот како вид е тесно поврзан со природата на духовен и религиозен план. Секогаш кога ќе престојуваме во шума или ливада се чувствуваме мирни, исполнети и спокојни. Чувството што го имаме додека сме опкружени со живиот свет, благопријатно делува врз психата на човекот, а со тоа ни помага и со справување со стрес.
