Шумата како училница

Еколошкото образование е неопходен процес со цел да се постигне еколошка писменост која ќе води до развој на еколошка свест кај новите генерации. Еколошкото образование меѓу другото претставува и запознавање со природата, биолошката разновидност и природните појави и феномени. Иако за дел од овие процеси, учениците може да се запознаат во училница и во училиштата, сепак најдобар начин младите да учат за природата е преку искуствено учење, односно учење со сите сетила, на терен во форма на теренска настава во шумата. Шумата и шумските екосистеми со прав наставен план може да се претвори во училница на отворено каде може да се разработат не се само теми од природонаука, туку и теми за социјален развој, општествена организација, раст и развој и спознавање на светот околу нас.

Фото: Димитар Егуменовски

Преку настава и посета во шумата, учениците може да се запознаат со неколку аспекти:

Шумата како екосистем

Кружењето на материјата, поврзаноста на живиот свет со животната средина, функционирањето на екосистемите, синџири на исхрана – ова се само дел од процесите кои учениците може да ги набљудуваат и да ги научат преку престој во шумата

Шумска биолошка разновидност

Шумите се екосистеми полни со живот со сите форми: растенија, габи и животни – сите со различни форми, бои, големи и старост. Без разлика на годишното време, во шумата секогаш има да се сретне по некој шумски жител.

Поврзаноста на човекот со шумата

Поврзаноста и зависноста на човекот од природата е важен аспект од заштитата на животната средина кој треба да биде јасен на новите генерации. Преку посета и настава во шумата, младите може директно да се запознаат со сите ресурси и екосистемските услуги што ги добиваме од шумите.

Одржлив развој

Одржливиот развој не е само појава во општеството и индустријата, туку сосема нов начин на водење на животот на човечката популација, што бара разумно користење на природните ресурси и грижа за животната средина. Шумите се екосистеми преку кои младите може точно да се запознаат со овој концепт преку практични примери и демонстрации за одржливо шумарство, користење на шумски продукти, заштита на растенијата и традиционалното користење на шумските ресурси.