Одржани модул 3 и 4 од обуката за јакнење на капацитетите на заинтересираните страни за концептот за екосистемски услуги

Од 1 до 3 јуни, во х.Unique во Охрид беа одржани третиот и четвртиот модул од Обуката за јакнење на капацитетите на заинтересираните страни за концептот за екосистемски услуги. Модулите беа фокусирани на интегрираната проценка на екосистемските услуги и интегрирањето на екосистемските услуги во планирањето на политиките.

Првите два дена, односно модулот 3 се однесуваше на интегрирана проценка на екосистемските услуги, а предавачи беа: Rudolf de Groot, претседател на извршниот одбор на ESP (Ecosystem Service Partnership) и основач и директор на Foundation for sustainable development (FSD) и Vince van ‘t Hoff (FSD). Дел од темите кои што беа обработени се: Упатство/водич за интегрирана проценка на екосистемските услуги, идентификација и мерење на ЕУ и анализа на бенефитите и вклучување на заинтересирани страни, монетарно вреднување и пресметување на Net Present Value, економски импликации (промени во користење/управување на земјиштето) и можни финансиски механизми.

Модулот 4 беше посветен на интегрирање на екосистемските услуги во планирањето на политиките преку предавањето на Arjan de Groot од Институт за геонауки и географија, Катедра за одржлив развој на пределот при Универзитетот Мартин Лутер Хале-Витенберг од Германија. Неговото предавање се состоеше од повеќе теми како: Управување со биодиверзитет и екосистемски услуги, разбирање на управувањето, нарушувања на пазарот, индиректни влијанија, дискутирање за различни инструменти за политики, влезни точки, финансиски механизми и потенцијални производи за комуникација и разбирање на шемите за плаќање на екосистемски услуги.

Во двата модули се работеше во работни групи на повеќе теми, а една од нив при крајот на обуката беше за идентификување на потенцијални инструменти за политики и стратегии за зачувување на биодиверзитетот во С.Македонија.

На обуката која што се одржува во рамки на Програмата за зачувување на природата (ПЗП), проект на Швајцарската агенција за развој и соработка (SDC), координиран од Фармахем од Скопје, присуствуваа претставници на институции и организации кои се поврзани со управување и мониторинг на природното наследство (веќе воспоставени заштитетни подрачја, оние кои се во постапка за репрогласување и сл.), со донесување на одлуки како и креатори на политики.