Што се екосистемски услуги?

Услугите од природата, т.е. екосистемските услуги, се дефинираат како „придобивки што луѓето ги добиваат од еко системите“. Тие директно или индиректно влијаат на опстанокот на луѓето и на нивниот квалитет на живот. Луѓето понекогаш забораваат колку природата и биодиверзитетот се важни за нивното секојдневно функционирање. Храната, облеката, живеењето, транспортот, лековите и енергијата се производи, односно услуги од различни екосистеми. Водата, храната и медицинските ресурси се некои од многуте суровини што луѓето ги добиваат директно од различните екосистеми.

Фото: Кристина Најдовска

Храната е значаен фактор во животната средина. Таа е услов за живот и главен носител на енергија во животната средина. Храната е дел од еко системите што нѐ поврзува сите. Сите екосистеми обезбедуваат услови за одгледување и собирање на храна, како и за лов и риболов. Oд сите услуги на екосистемите, производството на храна е единственото кое покажува постојан тренд на пораст во поновата историја. Но со климатските промени, глобалното затоплување и со загадувањето на почвите, водата и воздухот, храната ќе се намалува. И за луѓето и за сите други живи организми.

Екосистемите играат важна улога во обезбедувањето на протокот на вода и складирањето на свежа вода. На светот постои многу вода, но најголем дел од неа е со висок процент на сол и е дел од океаните. Најголеми депозити на слатка вода се глечерите, но таа вода не е секогаш достапна. Слатката вода не е важна само за опстанокот на луѓето, туку и за опстанокот на сите постоечки видови на животни и растенија.

Преку чувањето на животната средина, се грижиме екосистемските услуги што ни ги нуди природата да ги имаме и понатаму во иднина.