Програмата за зачувување на природата во Македонија започна со обука за јакнење на капацитетите на општините
На 2 и 3 декември во Берово се одржа првиот модул од обуката за јакнење на капацитетите на општините за надлежностите, начините и можностите за зачувување на биолошката разновидност и одржливото управување и користење на природните ресурси. На првиот модул учествува претставници на општините од сливот на р.Брегалница, како и општина Ресен и општините од Југоисточниот плански регион, како таргет општини на проектите координирани од UNDP. На овој начин се постигнува синергија во сеопфатниот пристап на проектите кои се реализираат во насока на зачувувањето на природата и одржливото управување на водите, поддржани од Швајцарската Конфедерација.
На учесниците најпрвин им беше презентирана законската регулатива во делот на зачувување на природата и надлежностите на општините во овој сегмент, а потоа преку работа во групи беа детектирани природните вредности што ги има во регионот.
Обуката е дел од активностите на Програмата за зачувување на природата во Македонија и ќе се реализира преку 7 модули, со динамика на спроведување по еден модул месечно. Со реализација на оваа обука, се очекува општините да ги зајакнат своите капацитети за изработка на предлог проекти за зачувување на природата и одржливо користење на природните ресурси, како и нивно успешно спроведување.
На крајот од обуката сите општини ќе имаат можност наученото да го применат во изработка на предлог проект, а најдобро подготвениот проект ќе може да се реализира со финансиска поддршка од Програмата.