Одбележан 22 мај, меѓународниот ден на биолошката разновидност

Централниот настан за одбележување на 22 мај, меѓународниот ден на биолошката разновидност оваа година за прв пат се одржа во источниот дел на Македонија – во Делчево, во организација на Програмата за зачувување на природата во Македонија, проектот „Поддршка на Република Македонија за ревизија на националната стратегија за биолошката разновидност со акционен план“ и Министерството за животна средина и просторно планирање, а во соработка со општина Делчево, Проектот за управување со речниот слив на Брегалница, Проектот за еколошка едукација, Македонското еколошко друштво и Центарот за развој на Источен плански регион. На почетокот на настанот поздравни обраќања имаа Директорот на Управата за животна средина, во рамки на Министерството за животна средина и просторно планирање, Амбасадорот на Швајцарската конфедерација во Македонија и градоначалникот на општина Делчево. Во своето обраќање неговата екселенција г-дин Лазарото ја истакна важноста на Македонија, а особено на  Брегалничкиот регион за биоразновидноста во Европа и поддршката што е овозможена од Швајцарската влада преку холистички пристап,  со инвестиции во областа на интегрирано управување со речниот слив на Брегалница, еколошка едукација и зачувувањето на природата да се овозможи одржлив развој на регионот. Според директорот на Управата за животна средина г-дин Трајковски воспоставувањето на ефикасен правен систем и стратешки рамки на заштита и одржливо користење на биолошката разновидност е јасно зацртана цел за  Република Македонија. Градоначалникот на општина Делчево г-дин Шехтански се заблагодари на поддршката што Швајцарската Конфедерација ја дава на Брегалничкиот регион и ја потенцира важноста јавната свест во зачувувањето на биолошката разновидност со која изобилува Брегалничкиот регион.

Настанот имаше за цел да го сврти вниманието на јавноста кон значењето на биолошката разновидност за целокупниот квалитет на живот и да придонесе кон подигање на свеста за зачувување на природата особено кај најмладата популација. Преку интерактивни еколошки игри, цртежи и експерименти најмладите од основните училишта „Ванчо Прке“ и „Климент Охридски“ од Делчево на креативен начин ја искажаа грижата за природата. Присутните граѓани имаа можност да ја видат и изложбата на најуспешните фотографии од конкурсот на тема „Биолошката разновидност во Брегалничкиот регион“ кој беше објавен од страна на Програмата за зачувување на природата во Македонија. Авторите на најдобрите три фотографии добија пригодни награди од страна на организаторот. Амбасадорот на Швајцарија и Националниот тим лидер на Програмата за зачувување на природата во Македонија  ги врачија наградите и им честитаа на победниците.

Сите партнерски ораганизации вклучени во реализација на настанот имаа штандови на кои присутните можеа да добијат повеќе информации за тековните активности и целите на програмите. Организаторите подготвија и посебни паноа и тотеми со инфармации за целите за биолошката разновидност од Аичи, Декадата на биолошка разновидност 2011-2020, прогласена од страна на Обединетите нации, како и за националната визија за биолошката разновидност, целите и приоритетите за нејзино зачувување и едукација во врска со важни видови растенија, габи и животни во земјата. Посетителите на настанот, а особено учениците покажаа голем интерес да дадат сопствени предлози како да ја зачуваме природата преку пишување на пораки на штандот на ПЗП на специјални картички кои ја отсликуваат биолошката разновидност во регионот и беа испечатени специјално за оваа намена.